Exo 38 | BJR | STEP | Beesareerafa akasia sáqari marasée minánnai tatúfirana suqára qáinda áuqinau. Miná kísaaqandanai faqa qúsandanai faqa amana amanakai 2.2 metres márinau. Maqá sáaqari kúradarafa qaara faqa qaara faqa 4 amana 1.3 metres márinau.

Exodus 38

Misá fadaméena faqa pauráqa faqa ámiqira ída múna úndianiféera áuqiqau.

(Rafúdoo 27:1-8)

1 Beesareerafa akasia sáqari marasée minánnai tatúfirana suqára qáinda áuqinau. Miná kísaaqandanai faqa qúsandanai faqa amana amanakai 2.2 metres márinau. Maqá sáaqari kúradarafa qaara faqa qaara faqa 4 amana 1.3 metres márinau. 2 Miná qaara faqa qaara faqa 4 átisaa aanairá foorá áuquqoofanoo márinau. Tatúfira qáinda moodaa saqari fánnoo kai átimau faqa qámbaanai faqa aanai faqa moodáa sáqarinnai kai áuquqoofanoo márinau. Mi aiqama ainaináusa booróosannai rafáaqa finau. 3 Mi tatufirána suqée maría qaindánasaa suqée maría ainaináusa booróosannai kai auqinau. Dandá afaqára fútufitauqa faqa savóorauqa faqa uqnauríra píritauqa faqa táfa fooqáa irana áti saaee írana faqa idá qáuni afaqée mária futufitáusa faqa aiqáma booróosannai kai áuqinau. 4 Mifá fukaasáana booróosannai áuquseenoo tatúfira bookisa aundurái kasaaqaí óoqeeqásee qámbaanai quqánau. 5 Tatúfira qáinda átiqara anaanu qaara fáqa qaara fáqa 4 áuquseeqa bookísa átiuqasaa rumbáqau. Misá aindúsi fandínna sáqari qánda upeekáaqeera rumbáqau. 6 Mifá akasia sáqari tatúfira qáinda aindúsifandínnana qaaraqánda maraséenoo booróosannai miqandá rafáaqafinau. 7 Mifá akasia sáqári marasée anaanu áuquqoonaki áusinau. Tatúfira qáinda indooíra saqarinnai kai aundurá faqaana áuqinau.

Firaa pirita nammári áuqèe fándinnana áuqinau.

(Rafúdoo 30:18)

8 Uíqaana máqa kooqíki dadaaqí maru ánaaseesa nárìqa booróosannai áuquqoo tánukana Beesareerána ámufanoo minánnai nammári áuqara difaanína faqa miná óosana faqa áuqinau.

Yáaweena úiqaana máqa dapú áuqu fíqu fíqu iqau.

(Rafúdoo 27:9-19)

9 Ámiqira sanda sufusée áuquqaa qámunnanannóo úiqaana máqasaa quqúsara foorá áuqu ititánau. Súani áfu dínni ataaqeenni (south) miná kisaaqa fánnoo 44 metres márinau. 10 Mi qamunnána dírifandínnana booróosannái dapu 20 áuqusee mina kúradeefandínnana ámaaqa miqí kai másee 20 áuquseeqa siruáannai táfára foorá miná amana kái áuqusee aunírifandínna sáqarina faqa minánnai kai áuqiqau. 11 Súani áfu dinní ataaqéenni undée kai íqa dínni ataaqeenni faqa miqí kai miqáu.

12 Súani kéeqee marú qáannai dapu qúsandanai miná kísaaqa 22 metres márinau. Miná dapu sáqari 10 faqa mina ámaaqa áuqirafa faqa 10 kaí márinau. Qamunna dírifandínnana táfarafoo íranauqa faqa aunírifandínna sáqarisa faqa siruáannnai kai áuqiqau. 13 Súani óosana qaannai kooqí márutinai aqa urúanai inóo máruna amana kai 22 metres márinau. 14 Mi kooqína dínni dínni dírifandínna qamunnafa 6.6 metres márinau. Mi kooqína dínni dínni qaaramoó dápu faqa miná ámaaqa faqa dínni dínni qaaramoó faqa miná ámaaqa faqa márinau. 16 Aiqáma qamunna dapusaa dírinoo márufa ámiqira qámunna kai áuqirafa márinau. 17 Aiqáma dápu fíqu fíqu írafa siruáannai rafáaqa fúqaa saqárinasaa ootúpanoo márinau. Minásaa qamunna dírifandínnana táfara foo íranauqa siruáannai kai áuqiqau. Miná dapu átimau faqa siruáannai kai rafáaqa fiqau. Mi saqarísa rakíqeefandínnana amaaqauqa booróosannai áuqiqau.

18 Kooqísaa ititára qámunna ámiqirafa márinau. Misá sipsípa asausi dirindáasi ákirana faqa pánnoona ákirana faqa faéena akiranannái faqa sufusée mi qamunnana áuqiqau. Áuquseeqa ámiqira sándannai óosana óosana ainaina amana áuqiqau. Mi qamunnána kísaaqa fannoo 9 metres márinau. Miná qúsa fannoo 2.2 metres márinau. Mi kooqína qámunna dapu rakíqarana amana kái márinau. 19 Misá mi qamunnána dapu sáqari qaara faqa qaara faqa kooqíki rakíqaranasaa díriqau. Mi dapúsa óosanaki booróosannai amaaqa áuqusee minakí rakíaqau. Mi dapúsa áti rafaaqafirana faqa auní rúmaqàa saqárisaa faqa táfara foorá íranauqa faqa siruáannai kai áuqiqau. 20 Úiqaana máqa átimau apúpuka árifandínna áikausa booróosannai kai áuqiqau. Úiqaana máqa dapu rakíqarana qumáraanífee qímasee apúpuka áqoosai faqa áfuqai faqa aruqaafá aiqáma booróosannai áuqira apupuka kai márinau.

Misá kóora faqa siruáa faqa booróosa faqa marasée Yáaweena úiqaana máqaki minánnai aináini máriqau.

21 Yáaweena úiqaana máqaki qaara oonisáa qísaukuqara 10 sánda úfa ákara rírafa márinau. Mi maqánaki aináini marúna kóora faqa siruáa faqa booróosa faqa márinau. Aanáiqikirana Áaroona ámaaku Itamarafa Reefina áiku ásauku qímannimi márufaqa misa mi koora ainaináusa ásaana rúmasee ákara rímariqau. 22 Beesareerafa Urina ámaaku Hurana ánaiqi Yudana áti márufa mifá aiqáma ainaina Yáaweefa Mooseena qímàmúndèe kái másee áuqinau. 23 Miná dadaaqí márufa Ooqooriabafa márinau. Mifá Aasamakana ámaaku Dannana áti márinau. Mifá óonisaa óosana óosana áinaina amana áuqi marúfa márinau. Mifa sipsípa asausí dirindáasi ákiranannái faqa pánnoona ákiranannái faqa faéena ákiranannai faqa ámiqira sánda sufusee ámiqira qamunna áuqimarúfa márinau. Kafaa mifá óosana óosaná ainaina amana áuqirana akóofása márinau. 24 Aiqáma kóorauqa náaquqara úiqaana máqa usakárara Yáaweena ámidee qufá miná ummaara úiqaana máqakinaa áinainauqa amana másee qáfee máru sikeerána amana 998 kilogram máree ániqau.

25 Aiqáma fásiqauqa 20 aukuana faqáasa núqu marasoofaqa misá nambáqa 603, 550 fasiqauqa takísa munnimma áqi máriqau. Mi takisána áqusoofaqa mi siruaaná qumáree úiqaana maqa síkeerasáa diriséeqa qáfoofanóo 3,430 kilograms márinau. 27 Máaqa atuna óosana ámaaqa áuqirafa 100 márinau. Mi siruáana moodáanaki ásaana rúmasoofanoo 3,400 kilograms márinau. Náaquqara úiqaana máaqaki qamunna díri marú sáqarisa rakíqarana ámaaqa faqa máaqa átuna rakíqarana ámaaqa aiqáma moodáa moodaa 34 kilograms kai márinau. 28 Miqímmáseeqa akaqá síruaa 30 kilograms amana káqi márunannoo aunírira sáqari faqa átuna rakíqarana áti máu faqa qamunna dírirana táfara foo írana faqa áuqiqau.

29 Yáaweena ámu booroosána umaara fannoo 2,425 kilograms márinau. 30 Mi booroosánannai Yáaweena úiqaana maqa kooqíki saqári rakíqarana ámaaqauqa áuqiqau. Aandáù tatúfira qáinda fáqa miná fukaa ásáana fáqa minakí suqée marú áinainausa fáqa minánnai kai áuqinau. 31 Dapu sáqari rakíqarana ámaaqauqa faqa kooqí saqári rakíqarana ámaaqauqa faqa úiqaana máaqa apupukauqa faqa dapu fíqu fíqu írana apúpukauqa faqa aiqáma mi booroosánannai kai áuqiqau.